[១៥៣] បណ្តាធម៌ទាំងនោះ អាការមិនត្រង់ តើដូចម្តេច។ អាការមិន​ត្រង់ ភាពនៃអាការមិនត្រង់ ភាពនៃសេចក្តីវៀចវេរ ភាពនៃសេចក្តីកោង ភាពនៃ​សេចក្តីក្ងិកក្ងក់ណា នេះហៅថា អាការមិនត្រង់។ បណ្តាធម៌ទាំងនោះ សេចក្តី​មិនទន់ភ្លន់ តើដូចម្ដេច។ សេចក្តី​មិនទន់ភ្លន់ អាការនៃសេចក្តីមិនទន់ភ្លន់ សេចក្តី​រឹងរូស សេចក្តីអាក្រក់ ភាពនៃ​សេចក្តីរឹងរូស ភាពនៃបុគ្គលមានចិត្តគគ្រីស​គគ្រូស ភាពនៃបុគ្គលមានចិត្តរឹង​កំព្រឹស ភាពនៃបុគ្គលមានចិត្តមិនទោរទន់ណា នេះហៅថា សេចក្តីមិនទន់ភ្លន់។