[៤] ​ម្នាលភិក្ខុ​ទាំងឡាយ បុគ្គល​ប្រកបដោយ​ធម៌​ ៣ យ៉ាង ​ដែលសំគាល់​បាន​ ថា​ជា​​ជនពាល​។ ​ ធម៌៣ តើដូចម្ដេច។ គឺបុគ្គល​មិន​ឃើញ​ទោសរបស់​ខ្លួន​ តាម​ទោស​ ១ លុះ​ឃើញទោស​តាមទោសហើយ មិនសំដែងទោសឲ្យសម​គួរ​ តាម​ធម៌​ ១ ទុកជា​សំដែងទោសរបស់ខ្លួន ប្រាប់បុគ្គលដទៃហើយ ក៏មិនទទួល​ទោស ឲ្យសម​គួរ​តាម​ធម៌​ ១។ ម្នាលភិក្ខុទាំងឡាយ បុគ្គលប្រកបដោយ​ធម៌​៣ នេះឯង ដែលគប្បី​ដឹង​បាន ថា​ជាជនពាល។ ម្នាលភិក្ខុ​ទាំងឡាយ បុគ្គល​ប្រកបដោយ​ធម៌​៣​ គប្បី​ដឹង​បាន ​ថា​ជា​បណ្ឌិត។ ធម៌​៣ តើដូចម្ដេច។ គឺ បុគ្គលឃើញ​ទោសរបស់​ខ្លួន​តាមទោស​ ១ លុះឃើញទោស​តាម​ទោស​ហើយ ក៏សំដែង​ទោស​ ឲ្យសមគួរ​តាម​ធម៌ ១ លុះ​សំដែង​​ទោស ប្រាប់​បុគ្គល​ដទៃហើយ ក៏ទទួល​ទោស ឲ្យសម​គួរតាមធម៌​ ១។ ម្នាលភិក្ខុ​ទាំងឡាយ បុគ្គល​ប្រកបដោយធម៌​៣​នេះឯង ដែល​គប្បីដឹង​បាន ថា​ជាបណ្ឌិត។