km:tipitaka:sut:an:03:sut.an.03.014

ចក្កវត្តិសូត្រ ទី៤

សង្ខេប

គុណ​លក្ខណៈ​របស់​ស្តេច​សុចរិត និង​អ្នក​ដឹក​នាំ។

an 03.014 បាលី cs-km: sut.an.03.014 អដ្ឋកថា: sut.an.03.014_att PTS: ?

ចក្កវត្តិសូត្រ ទី៤

?

បកប្រែពីភាសាបាលីដោយ

ព្រះសង្ឃនៅប្រទេសកម្ពុជា ប្រតិចារិកពី sangham.net ជាសេចក្តីព្រាងច្បាប់ការបោះពុម្ពផ្សាយ

ការបកប្រែជំនួស: មិនទាន់មាននៅឡើយទេ

អានដោយ ឧបាសិកា វិឡា

(៤. ចក្កវត្តិសុត្តំ)

[១៤] ម្នាលភិក្ខុ​ទាំងឡាយ​ ស្ដេចចក្រ​ពត្តិអង្គណា ប្រកបដោយធម៌1) ទ្រង់ធម៌2) ស្ដេច​អង្គនោះ ទ្រង់​ញុំាងចក្រ​ ដែល​មិន​មែន​ជា​របស់ស្ដេច ​ឲ្យប្រព្រឹត្ត​ទៅ។ កាល​ព្រះ​មាន​ព្រះ​ភាគ ទ្រង់​ត្រាស់​យ៉ាង​នេះ មាន​ភិក្ខុ​ ១រូប ក្រាប​ទូល​សួរ​ព្រះ​មាន​ព្រះ​ភាគ យ៉ាង​នេះថា សូម​ទ្រង់ព្រះមេត្តាប្រោស ចក្រ​របស់​ស្ដេច​ចក្រ​ពត្តិ ប្រកប​ដោយ​ធម៌ ទ្រង់​ធម៌ តើ​ដូចម្ដេច។ ព្រះមាន​ព្រះភាគ​ ទ្រង់​ត្រាស់​តបថា ម្នាល​ភិក្ខុ ចក្រ​នោះ ក៏គឺ​ធម៌3) ដូច្នេះ រួច​ទ្រង់ត្រាស់ត​ទៅ​ទៀតថា មា្នល​ភិក្ខុ ក្នុង​លោកនេះ ស្ដេច​ចក្រ​ពត្តិ ប្រកបដោយ​ធម៌ ទ្រង់​ធម៌ ទ្រង់​អាស្រ័យ​ធម៌​តែ​មួយ​យ៉ាង ធ្វើ​សក្ការៈ​ចំពោះ​ធម៌ គោរព​ធម៌ កោត​ក្រែង​ធម៌ យក​ធម៌ជា​ទង់​ជ័យ យក​ធម៌ជា​ទង់​យស យក​ធម៌ជាអធិបតី ចាត់ចែង​នូវ​ការ​រក្សា ​ទប់ទល់គ្រប់​គ្រង ​ប្រកប​ដោយ​ធម៌ ចំពោះ​ជន​ខាង​ក្នុង ម្នាល​ភិក្ខុ មួយ​ទៀត ស្ដេច​ចក្រពត្តិ ប្រកបដោយ​ធម៌​ ទ្រង់ធម៌ ទ្រង់​អាស្រ័យ​ធម៌តែមួយ​យ៉ាង ធ្វើសក្ការៈ​ចំពោះធម៌ គោរពធម៌ កោត​ក្រែងធម៌ យកធម៌​ជាទង់ជ័យ យកធម៌ជាទង់យស យកធម៌​ជាអធិបតី ចាត់ចែង​នូវ​ការ​រក្សា ​ទប់ទល់ គ្រប់គ្រងប្រកបដោយ​ធម៌ ចំពោះ​ពួក​ក្សត្រិយ៍អ្នក​ចុះ​ចូល ពួក​ពល ពួក​ព្រាហ្មណ៍ គហបតី ពួក​អ្នក​និគម អ្នក​ជន​បទ ពួក​សម​ណ​ព្រាហ្មណ៍ និង​ពួក​ម្រឹគ​បក្សី។ ម្នាល​ភិក្ខុ​ លុះ​ស្ដេច​ចក្រ​ពត្តិ ប្រកប​ដោយ​ធម៌ ទ្រង់​ធម៌ អង្គ​នោះ​ឯង អា​ស្រ័យ​ធម៌តែមួយ​យ៉ាង ធ្វើ​សក្ការៈ​ចំពោះធម៌ គោរព​ធម៌ កោត​ក្រែង​ធម៌ យកធម៌ជា​ទង់ជ័យ យកធម៌ជា​ទង់​យស យកធម៌​ជា​អធិបតី ចាត់​ចែង​នូវ​ការ​រក្សា​ទប់​ទល់ គ្រប់​គ្រង​ ប្រកបដោយ​ធម៌ ចំពោះជនខាងក្នុង ចាត់ចែងនូវការរក្សា ទប់ទល់ គ្រប់គ្រង ប្រកបដោយធម៌ ចំពោះពួក​ក្សត្រិយ៍អ្នក​ចុះ​ចូល ពួក​ពល ពួក​ព្រាហ្មណ៍​ គហបតី ពួក​អ្នក​និគម ជនបទ ពួកសមណ​ព្រាហ្មណ៍ និង​ពួកម្រឹគ​បក្សី ទើបញុំាង​ចក្រ​ ឲ្យប្រព្រឹត្ត​តាម​ធម៌កើត។ ចក្រ​នោះ មនុស្ស​ណា​មួយ ជាសត្រូវ ​ធ្វើ​បដិវត្ត​ដោយ​ដៃ​ពុំបាន​ឡើយ។ ម្នាល​ភិក្ខុ សេចក្ដី​នេះ​ មានដូច​ជា​ព្រះ​តថា​គត អរហន្ត​ សម្មាសម្ពុទ្ធ ប្រកបដោយ​ធម៌4) ​ទ្រង់ធម៌5) អាស្រ័យ​ធម៌​តែ​មួយ​យ៉ាង ​ធ្វើ​សក្ការៈ​ចំពោះ​ធម៌ គោរពធម៌ កោតក្រែងធម៌ យក​ធម៌​ជាទង់​ជ័យ យក​ធម៌​ជាទង់​យស យកធម៌​ជា​អធិបតី ចាត់​ចែង​នូវការ​រក្សា ​ទប់​ទល់ គ្រប់​គ្រង​ ប្រកប​ដោយ​ធម៌ ចំពោះកាយ​កម្មថា កាយកម្មបែប​នេះ ​គួរ​សេព កាយ​កម្ម​បែបនេះ ​មិន​គួរ​សេព​ឡើយ។ ម្នាល​ភិក្ខុ មួយទៀត ព្រះ​តថាគត អរហន្ត​ សម្មា​សម្ពុទ្ធ ប្រកបដោយ​ធម៌ ទ្រង់​ធម៌​ អាស្រ័យធម៌​តែ​មួយ​យ៉ាង ​ធ្វើ​សក្ការៈ​ចំពោះ​ធម៌ គោរព​ធម៌​ កោត​​ក្រែង​ធម៌ ​យកធម៌ជាទង់​ជ័យ យក​ធម៌​ជាទង់យស យក​ធម៌​ជា​អធិបតី ចាត់​ចែង​នូវ​ការ​រក្សា ទប់ទល់ ​គ្រប់គ្រង​ ប្រកប​ដោយ​ធម៌​ ចំពោះ​វចីកម្ម​ថា​ វចីកម្មបែបនេះ ​គួរ​សេព វចី​កម្ម​បែប​នេះ ​មិន​គួរ​សេពឡើយ។ ម្នាលភិក្ខុ មួយ​ទៀត ព្រះ​តថាគត អរហន្ត​សម្មា​សម្ពុទ្ធ ប្រកប​ដោយ​ធម៌ ទ្រង់​ធម៌ អាស្រ័យ​ធម៌តែ​មួយ​យ៉ាង ធ្វើ​សក្ការៈ​ចំពោះធម៌ គោរពធម៌ កោត​ក្រែង​​ធម៌ យកធម៌ជា​ទង់ជ័យ យកធម៌​ជាទង់យស យកធម៌​ជា​អធិបតី ចាត់​ចែង​នូវ​ការ​រក្សា​ ទប់ទល់ គ្រប់គ្រង​ប្រកប​ដោយ​ធម៌ ចំពោះ​មនោកម្ម​ថា មនោកម្ម​បែប​នេះ​ គួរ​សេព មនោកម្ម​បែប​នេះ មិនគួរ​សេព​ឡើយ។ ម្នាលភិក្ខុ ព្រះតថាគត​នោះ​ឯង ជាអរហន្ដ ​សម្មាសម្ពុទ្ធ ប្រកប​ដោយ​ធម៌ ទ្រង់​ធម៌ អាស្រ័យ​នូវ​ធម៌​តែ​មួយយ៉ាង ​ធ្វើសក្ការៈចំពោះ​ធម៌ គោរព​ធម៌ កោត​ក្រែង​ធម៌ យកធម៌ជាទង់ជ័យ យកធម៌ជាទង់​យស យក​ធម៌​ជា​អធិបតី ចាត់​ចែង​នូវការរក្សា​ ទប់ទល់ គ្រប់គ្រង​ ប្រកបដោយ​ធម៌ ចំពោះកាយ​កម្ម ចាត់​ចែង​នូវ​ការ​រក្សា ​ទប់​ទល់ គ្រប់គ្រង​ ប្រកបដោយ​ធម៌ ចំពោះវចី​កម្ម ចាត់​ចែង​នូវ​ការ​រក្សា​ ទប់​ទល់ គ្រប់គ្រង​ ប្រកបដោយ​ធម៌ ចំពោះមនោកម្ម ញុំាងធម្មចក្រ ដ៏ប្រសើរ ឲ្យប្រព្រឹត្តទៅ តាម​ធម៌នុ៎ះ​ឯង។ ចក្កនោះ សមណៈ ឬព្រាហ្មណ៍ ទេវតា ​មារ ​ព្រហ្ម ឬ​អ្នក​ណា​មួយ​ ក្នុង​លោក ធ្វើ​បដិវត្ត​ពុំបាន​ឡើយ។

 

លេខយោង

1)
ប្រកប​ដោយកុសលកម្មបថ ទាំង១០។
2)
ញុំាងមហាជន ឲ្យត្រេកអរ ដោយកុសលកម្មបថ ១០។
3)
សំដៅយកកុសលកម្មបថ។ អដ្ឋកថា។
4)
ប្រកបដោយនវលោកុត្តរធម៌។
5)
ព្រះអង្គញុំាងមហាជន ឲ្យរីករាយ ដោយនវលោកុត្តរធម៌។ អដ្ឋកថា។
km/tipitaka/sut/an/03/sut.an.03.014.txt · ពេលកែចុងក្រោយ: 2023/04/02 02:18 និពន្ឋដោយ Johann