km:tipitaka:sut:an:03:sut.an.03.106

ទុតិយអស្សាទសូត្រ ទី៣

សង្ខេប

«…បើ​​អានិសង្ស​នុ៎ះ មិន​មាន​​ក្នុង​​លោក ពួក​​សត្វ​ ក៏​មិន​​គប្បី​​ត្រេក​​ត្រអាល​​​នឹង​អានិសង្ស​នេះ…» អរិយសច្ចៈ យ៉ាង ដោលពាក្យផ្សេង។

an 03.106 បាលី cs-km: sut.an.03.106 អដ្ឋកថា: sut.an.03.106_att PTS: ?

ទុតិយអស្សាទសូត្រ ទី៣

?

បកប្រែពីភាសាបាលីដោយ

ព្រះសង្ឃនៅប្រទេសកម្ពុជា ប្រតិចារិកពី sangham.net ជាសេចក្តីព្រាងច្បាប់ការបោះពុម្ពផ្សាយ

ការបកប្រែជំនួស: មិនទាន់មាននៅឡើយទេ

អានដោយ ឧបាសិកា ស៊ុនហ៊ាង

(៣. ទុតិយអស្សាទសុត្តំ)

[១០៧] ម្នាល​ភិក្ខុ​ទាំងឡាយ បើ​អានិសង្សនុ៎ះ មិនមាន​ក្នុង​លោក ពួក​សត្វ​ ក៏មិន​គប្បី​ត្រេក​ត្រអាល​​នឹង​អានិសង្សនេះ ក្នុង​លោក​ដែរ ម្នាល​ភិក្ខុ​ទាំង​ឡាយ​ ព្រោះហេតុ​តែអានិសង្ស​ មាននៅ​ក្នុង​លោក ​ពួកសត្វ​ទើប​ត្រេកត្រអាល​​ក្នុងលោក។ ម្នាល​ភិក្ខុ​ទាំងឡាយ បើទោស​ក្នុង​លោកមិន​មានទេ ពួក​សត្វ​ ក៏​​មិន​គប្បី​នឿយណាយ​នឹង​ទោស​នេះ ​ក្នុង​លោក​ដែរ ម្នាល​ភិក្ខុ​ទាំងឡាយ ព្រោះ​ហេតុ​តែទោស​មាន​នៅក្នុង​លោក ទើប​ពួក​សត្វ ​នឿយ​ណាយក្នុងលោក។ ម្នាល​ភិក្ខុ​ទាំងឡាយ បើ​ការ​រលាស់​ខ្លួន​ចេញនុ៎ះ មិនមានក្នុង​លោក​ទេ ពួក​សត្វ​ ក៏​មិន​គប្បី​រលាស់​ខ្លួន​នេះ ចេញ​ចាក​លោក​បាន​ដែរ ម្នាល​ភិក្ខុ​ទាំងឡាយ ព្រោះ​ហេតុ​តែការ​រលាស់ខ្លួន​ចេញ​ មាននៅក្នុង​លោក ទើប​ពួក​សត្វ​រលាស់​ខ្លួន​ ចេញ​ចាក​លោក​បាន។ ម្នាល​ភិក្ខុ​ទាំងឡាយ ពួក​សត្វ​មិន​ទាន់​ដឹង​ច្បាស់ តាម​ពិតនូវ​អានិសង្ស​ថាជា​អានិសង្សផង នូវទោស​ថាជា​ទោស​ផង នូវ​ការរលាស់ខ្លួន​ ចេញ​ចាក​លោក​ថា ជាការរលាស់​ខ្លួន​ចេញ​ផង ដរាប​ណា ម្នាល​ភិក្ខុ​ទាំងឡាយ សត្វ​មិន​ទាន់​ប្រាសចេញ​ មិន​ទាន់​គេចចេញ មិន​ទាន់​រួច​ផុត​ស្រឡះ ​ចាក​លោក​ ព្រម​ទាំង​ទេវលោក​ មារលោក ​ព្រហ្ម​លោក ​ចាក​ពពួក​សត្វ​ ព្រម​ទាំង​សមណ​ព្រហ្ម​ណ៍ ទាំង​​មនុស្ស​ជាសម្មតិទេព​ និង​មនុស្ស​ដ៏​សេស មាន​ចិត្ត​មិន​ទាន់​ប្រាសចាកព្រំដែន​ដរាប​នោះ។ ម្នាល​ភិក្ខុ​ទាំងឡាយ លុះ​តែពួក​សត្វ​ ដឹង​ច្បាស់តាមពិត នូវ​អានិសង្ស ថាជាអានិសង្ស​ផង នូវ​ទោស​ ថាជា​ទោសផង នូវ​ការរលាស់​ខ្លួន​ចេញ ​ចាក​លោក​ថា ជាការ​រលាស់​ខ្លួន​ចេញ​ផង ក្នុង​កាល​ណា ម្នាល​ភិក្ខុ​ទាំងឡាយ ពួក​សត្វ​ទើប​ប្រាស​ចេញ គេច​ចេញ ​រួច​ផុត​ស្រឡះចាក​លោក ​ព្រម​ទាំង​ទេវលោក មារ​លោក ព្រហ្ម​លោក ចាក​ពពួក​សត្វ ព្រម​ទាំង​សមណព្រាហ្មណ៍ ទាំងមនុស្ស​ជា​សម្មតិទេព និង​មនុស្ស​ដ៏​សេស ​មាន​ចិត្ត​ប្រាសចាក​ព្រំដែន​ ក្នុង​កាល​នោះ។

 

លេខយោង

km/tipitaka/sut/an/03/sut.an.03.106.txt · ពេលកែចុងក្រោយ: 2023/05/25 14:42 និពន្ឋដោយ Johann