km:tipitaka:sut:an:03:sut.an.03.123

មោនេយ្យសូត្រ ទី១០

សង្ខេប

ភាពជា​អ្នក​ប្រាជ្ញ ៣យ៉ាង។

an 03.123 បាលី cs-km: sut.an.03.123 អដ្ឋកថា: sut.an.03.123_att PTS: ?

មោនេយ្យសូត្រ ទី១០

?

បកប្រែពីភាសាបាលីដោយ

ព្រះសង្ឃនៅប្រទេសកម្ពុជា ប្រតិចារិកពី sangham.net ជាសេចក្តីព្រាងច្បាប់ការបោះពុម្ពផ្សាយ

ការបកប្រែជំនួស: មិនទាន់មាននៅឡើយទេ

អានដោយ ឧបាសិកា វិឡា

(១០. មោនេយ្យសុត្តំ)

[១២៤] ម្នាលភិក្ខុ​ទាំង​ឡាយ ភាពជា​អ្នក​ប្រាជ្ញនេះ ​មាន ៣យ៉ាង។ ៣យ៉ាង​គឺអ្វីខ្លះ។ គឺ​ភាព​ជាអ្នក​ប្រាជ្ញផ្លូវ​កាយ ​១ ភាព​ជាអ្នក​ប្រាជ្ញ​ផ្លូវ​វាចា ១ ភាព​ជាអ្នក​ប្រាជ្ញ​ផ្លូវ​ចិត្ត​ ១។ ម្នាលភិក្ខុ​ទាំង​ឡាយ ចុះភាព​ជាអ្នកប្រាជ្ញ​ផ្លូវ​កាយ តើដូចម្ដេច។ ម្នាលភិក្ខុ​ទាំង​ឡាយ ភិក្ខុក្នុង​សាសនានេះ វៀរចាកការសម្លាប់​សត្វ វៀរចាក​ការ​លួច​ទ្រព្យគេ វៀរចាក​ការ​ប្រព្រឹត្តិមិន​ប្រសើរ។ ម្នាលភិក្ខុ​ទាំង​ឡាយ នេះហៅថា ភាព​ជាអ្នក​ប្រាជ្ញ​ផ្លូវកាយ។ ម្នាលភិក្ខុ​ទាំង​ឡាយ ចុះភាព​ជាអ្នក​ប្រាជ្ញ​ផ្លូវ​វាចា តើ​ដូចម្ដេច។ ម្នាលភិក្ខុ​ទាំង​ឡាយ ភិក្ខុ​ក្នុង​សាសនានេះ វៀរ​ចាក​ការពោល​ពាក្យ​កុហក វៀរ​ចាក​ការពោល​ពាក្យញុះញង់ វៀរ​ចាកការ​ពោល​ពាក្យ​អាក្រក់ វៀរចាក ការពោលពាក្យឥត​ប្រយោជន៍។ ម្នាលភិក្ខុ​ទាំង​ឡាយ នេះហៅថា ភាពជាអ្នក​ប្រាជ្ញ​ផ្លូវ​វាចា។ ម្នាលភិក្ខុ​ទាំង​ឡាយ ចុះភាព​ជាអ្នកប្រាជ្ញ​ផ្លូវ​ចិត្ត​ តើដូចម្ដេច។ ម្នាលភិក្ខុ​ទាំង​ឡាយ ភិក្ខុ​ក្នុងសាសនា​នេះ បានធ្វើ​ឲ្យជាក់​ច្បាស់ ​នូវ​ចេតោវិមុត្ដិ​ និង​បញ្ញាវិមុត្តិ ដែល​មិន​មាន​អាសវៈ ព្រោះអស់​ទៅ នៃអាសវៈ​ទាំងឡាយ ដោយ​ប្រាជ្ញា​​ដ៏ឧត្ដម ដោយ​ខ្លួន​ឯង ក្នុងបច្ចុប្បន្ននេះ សម្រេច​សម្រាន្តនៅ។ ម្នាលភិក្ខុ​ទាំង​​ឡាយ នេះហៅថា ភាព​ជាអ្នក​ប្រាជ្ញ​ផ្លូវ​ចិត្ត។ ម្នាលភិក្ខុ​ទាំង​ឡាយ ភាព​ជាអ្នក​ប្រាជ្ញ មាន៣ យ៉ាង​ប៉ុណ្ណេះ។

អ្នកប្រាជ្ញទាំងឡាយ ពោល​ចំពោះ​បុគ្គល ដែលជាអ្នក​ប្រាជ្ញផ្លូវ​កាយ ផ្លូវ​វាចា ផ្លូវ​ចិត្ត មិន​មាន​អាសវៈ ជាអ្នក​ប្រាជ្ញ បរិបូណ៌​ដោយ​ភាពជាអ្នក​ប្រាជ្ញ ថាជាអ្នក​មាន​បាប​លះបង់​អស់​ហើយ។

ចប់ អាបាយិកវគ្គ ​ទី២។

ឧទ្ទាន​នៃអាបាយិកវគ្គ​នោះគឺ

ពោល​អំពី​បុគ្គល​ទៅ​កាន់​អបាយ ១ អំពី​បុគ្គល​រកបានដោយ​ក្រ ១ អំពី​អប្បមេយ្យ​បុគ្គល ​ជាដើម ១ អំពីបុគ្គល​បាន​អរូប​ជ្ឈាន មិន​ញាប់​ញ័រ ១ អំពីវិបត្តិ មានសេចក្ដី​ប្រៀបដោយ​បាសកា មាន​ជ្រុង​ប្រាំ​មួយ ១ អំពី​កម្មន្តវិបត្តិ ជាដើម ១ អំពី​ការ​ស្អាត មាន​ពីរលើក ១ អំពីភាពជាអ្នក​ប្រាជ្ញ ១។

 

លេខយោង

km/tipitaka/sut/an/03/sut.an.03.123.txt · ពេលកែចុងក្រោយ: 2024/05/15 17:18 និពន្ឋដោយ Johann