km:tipitaka:sut:an:08:sut.an.08.038

សប្បុរិសសូត្រ ទី៨

សង្ខេប

សប្បុរស កាល​កើត​ក្នុង​ត្រកូល រមែង​ប្រព្រឹត្ត​ទៅ ដើម្បី​ប្រយោជន៍​ច្រើន តើ​ដូ​ម្តេច​ខ្លះ?

an 08.038 បាលី cs-km: sut.an.08.038 អដ្ឋកថា: sut.an.08.038_att PTS: ?

សប្បុរិសសូត្រ ទី៨

?

បកប្រែពីភាសាបាលីដោយ

ព្រះសង្ឃនៅប្រទេសកម្ពុជា ប្រតិចារិកពី sangham.net ជាសេចក្តីព្រាងច្បាប់ការបោះពុម្ពផ្សាយ

ការបកប្រែជំនួស: មិនទាន់មាននៅឡើយទេ

អានដោយ ឧបាសិកា វិឡា

(៨. សប្បុរិសសុត្តំ)

[៣៨] ម្នាលភិក្ខុទាំងឡាយ សប្បុរស កាលកើតក្នុង​ត្រកូល រមែងប្រព្រឹត្ត​ទៅ ដើម្បី​ប្រយោជន៍ ដើម្បី​សេចក្តី​ចំរើន ដើម្បី​សេចក្តីសុខ​ដល់ជន​ច្រើន ប្រព្រឹត្តទៅ ដើម្បី​ប្រយោជន៍ ដើម្បី​សេចក្តីចំរើន ដើម្បី​សេចក្តីសុខ​ដល់​មាតាបិតា ប្រព្រឹត្តទៅ ដើម្បី​ប្រយោជន៍ ដើម្បី​សេចក្តី​ចំរើន ដើម្បី​សេចក្តី​សុខដល់​បុត្ត​ភរិយា ប្រព្រឹត្តទៅ ដើម្បី​ប្រយោជន៍ ដើម្បី​សេចក្តី​ចំរើន ដើម្បី​សេចក្តីសុខ​ដល់​បុរស​ជា​ទាសកម្មករ ប្រព្រឹត្តទៅ ដើម្បី​ប្រយោជន៍ ដើម្បី​សេចក្តីចំរើន ដើម្បី​សេចក្តីសុខ ដល់​មិត្ត និង​អាមាត្យ​ទាំងឡាយ ប្រព្រឹត្តទៅ ដើម្បី​ប្រយោជន៍ ដើម្បីសេចក្តី​ចំរើន ដើម្បី​សេចក្តី​សុខ​ដល់ពួក​ញាតិ ដែល​ចែកឋាន​ទៅកាន់​បរលោក ប្រព្រឹត្តទៅ ដើម្បី​ប្រយោជន៍ ដើម្បី​សេចក្តី​ចំរើន ដើម្បី​សេចក្តីសុខ​ដល់​ព្រះរាជា ប្រព្រឹត្តទៅ ដើម្បី​ប្រយោជន៍ ដើម្បី​សេចក្តី​ចំរើន ដើម្បី​សេចក្តី​សុខ​ដល់​ពួកទេវតា ប្រព្រឹត្តទៅ ដើម្បី​ប្រយោជន៍ ដើម្បីសេចក្តី​ចំរើន ដើម្បី​សេចក្តី​សុខ​ដល់​សមណ​ព្រាហ្មណ៍​ទាំងឡាយ។ ម្នាលភិក្ខុ​ទាំងឡាយ មហាមេឃ កាល​ញុំាងសំទូង​ទាំងអស់ ឲ្យ​សម្រេច​ព្រម រមែង​ប្រព្រឹត្តទៅ ដើម្បី​ប្រយោជន៍ ដើម្បី​សេចក្តី​ចំរើន​ដល់​ជន​ច្រើន។បេ។ មាន​ឧបមា​ដូចម្តេច​មិញ ម្នាលភិក្ខុ​ទាំងឡាយ សប្បុរស កាលកើត​ក្នុងត្រកូល រមែង​ប្រព្រឹត្តទៅ ដើម្បី​ប្រយោជន៍ ដើម្បីសេចក្តី​ចំរើន ដើម្បីសេចក្តីសុខ​ដល់ជនច្រើន ប្រព្រឹត្ត​ទៅ ដើម្បី​ប្រយោជន៍ ដើម្បីសេចក្តី​ចំរើន ដើម្បីសេចក្តី​សុខ ដល់​មាតា និង​បិតា​ទាំងឡាយ ប្រព្រឹត្តទៅ ដើម្បី​ប្រយោជន៍ ដើម្បីសេចក្តី​ចំរើន ដើម្បីសេចក្តី​សុខ ដល់​បុត្តភរិយា ប្រព្រឹត្តទៅ ដើម្បីប្រយោជន៍ ដើម្បីសេចក្តី​ចំរើន ដើម្បី​សេចក្តីសុខ ដល់​បុរស​ជា​ទាសកម្មករ ប្រព្រឹត្តទៅ ដើម្បីប្រយោជន៍ ដើម្បីសេចក្តី​ចំរើន ដើម្បីសេចក្តីសុខ ដល់​មិត្ត និង​​អាមាត្យទាំងឡាយ ប្រព្រឹត្តទៅ ដើម្បីប្រយោជន៍ ដើម្បីសេចក្តី​ចំរើន ដើម្បី​សេចក្តីសុខ ដល់ពួក​ញាតិ ដែលចែកឋាន ទៅកាន់បរលោក ប្រព្រឹត្តទៅ ដើម្បីប្រយោជន៍ ដើម្បីសេចក្តី​ចំរើន ដើម្បីសេចក្តីសុខ ដល់ព្រះរាជា ប្រព្រឹត្តទៅ ដើម្បីប្រយោជន៍ ដើម្បី​សេចក្តី​ចំរើន ដើម្បីសេចក្តី​សុខ ដល់​ពួកទេវតា ប្រព្រឹត្តទៅ ដើម្បីប្រយោជន៍ ដើម្បីសេចក្តី​ចំរើន ដើម្បីសេចក្តី​សុខ ដល់​សមណ​ព្រាហ្មណ៍​ទាំងឡាយ ក៏មាន​ឧបមេយ្យ​ដូច្នោះ​ដែរ។

បុគ្គលប្រកបដោយបញ្ញា កាលនៅគ្រប់គ្រងផ្ទះ រមែង​ប្រព្រឹត្ត​ទៅ ដើម្បី​ប្រយោជន៍​ដល់​ពួក​ជនច្រើន ជាអ្នក​មិនខ្ជិលច្រអូស ក្នុង​វេលាយប់ និង​​ថ្ងៃ កាល​នឹករលឹក​ដល់​បុព្វការគុណ​ ដែលមាតា និងបិតាធ្វើហើយ រមែងបូជា​មាតាបិតា​ជាមុន ដោយ​ហេតុ​ប្រកប​ដោធម៌ រមែងកោតក្រែង​ចំពោះ​បព្វជិត ជាអនាគារិកបុគ្គល ជា​ព្រហ្មចារីបុគ្គល មានសទ្ធា​ដម្កល់មាំ មានសីល​ជាទីស្រលាញ់ លុះដឹងច្បាស់​នូវធម៌​ទាំងឡាយ​ហើយ រមែង​បូជា​ បុគ្គលណា​ដែលមាន​ប្រយោជន៍​ដល់ព្រះរាជា មានប្រយោជន៍​ដល់ទេវតា មានប្រយោជន៍​ដល់ពួកញាតិ ដល់មិត្ត​សំឡាញ់ ដម្កល់ស៊ប់​ក្នុង​ព្រះសទ្ធម្ម បុគ្គលនោះ​ឈ្មោះថា​ មាន​ប្រយោជន៍​ដល់បុគ្គល​ទាំងអស់ បុគ្គលណា កំចាត់បង់​នូវមន្ទិល គឺ​សេចក្តីកំណាញ់​ បុគ្គលនោះ រមែង​ជួបប្រទះ​នូវលោក​ក្សេមក្សាន្ត។​

 

លេខយោង

km/tipitaka/sut/an/08/sut.an.08.038.txt · ពេលកែចុងក្រោយ: 2023/04/02 02:18 និពន្ឋដោយ Johann