[៤៧] សម័យមួយ ព្រះដ៏មានព្រះភាគ កាលគង់នៅក្នុង​មិគារមាតុប្រាសាទ ក្នុង​វត្តបុព្វារាម ជិតក្រុង​សាវតី្ថ។ គ្រានោះ នាង​វិសាខាមិគារមាតា។បេ។ អង្គុយ​ក្នុង​ទីសមគួរ​។ លុះ​នាងវិសាខាមិគារមាតា អង្គុយ​ក្នុងទី​សម​គួរហើយ​ ព្រះដ៏មានព្រះ​ភាគ ទ្រង់ត្រាស់​ដូច្នេះ​ថា ម្នាលនាងវិសាខា មាតុគ្រាម​ប្រកបដោយ​ធម៌ ៨ ប្រការ លុះបែក​ធ្លាយ​រាងកាយ ស្លាប់ទៅ រមែង​ទៅកើត​ជាមួយនឹង​ពួក​ទេវតា​មនាបកាយិកា។ ប្រកប​ដោយធម៌ ៨ ប្រការ តើ​ដូចម្ដេចខ្លះ។ ម្នាលនាងវិសាខា មាតុគ្រាម ក្នុង​លោកនេះ ដែល​មាតាបិតា មានប្រាថ្នា​សេចក្ដី​ចំរើន ស្វែងរកប្រយោជន៍ ជាអ្នក​អនុគ្រោះ អាស្រ័យ​នូវសេចក្ដី​អនុគ្រោះ បានរៀបចំ​ឲ្យដល់​ស្វាមីណា​ហើយ ជាស្រី​ក្រោកមុន ដេកក្រោយ ទទួលស្ដាប់​កិច្ចការអ្វីៗ ប្រព្រឹត្តនូវ​អំពើជាទី​គាប់ចិត្ត ពោលពាក្យ​ជាទី​ស្រឡាញ់ ចំពោះ​ស្វាមីនោះ ១។បេ។ ជា​ស្ដ្រី​មានចាគៈ មានចិត្តប្រាសចាក​មន្ទិល គឺសេចក្ដី​កំណាញ់ នៅគ្រប់គ្រងផ្ទះ មាន​ទានបរិច្ចាគ​ស្រឡះហើយ មានដៃលាង​ហើយ ត្រេកអរ​ក្នុងការ​លះបង់ គួរដល់​ពួកស្មូម ត្រេកអរ​ក្នុងការ​ចែករលែក​នូវទាន ១​។ ម្នាល​នាងវិសាខា មាតុគ្រាម ប្រកបដោយ​ធម៌ ៨ ប្រការ​នេះឯង លុះបែកធ្លាយ​រាងកាយ​ស្លាប់ទៅ រមែងទៅ​កើតជា​មួយនឹង​ពួក​ទេវតាមនាបកាយិកា។

មាតុគ្រាមណា មានព្យាយាម ខ្វល់ខ្វាយ​ចិញ្ចឹមស្វាមីនោះ​សព្វកាល​ជានិច្ច មិន​មើល​ងាយ​បុរស​ជាស្វាមី ដែលនាំមក​នូវសេចក្ដី​ប្រាថ្នាគ្រប់យ៉ាងនោះ ជាស្រ្ដីល្អ មិនបាន​ធ្វើស្វាមីឲ្យ​ក្ដៅក្រហាយ ដោយពាក្យ​ច្រណែន ជាស្រ្ដី​មានបញ្ញា តែង​បូជា​ស្វាមី និងបុគ្គល​ដែលជាទី​គោរព​ទាំងអស់ ជាស្រ្ដីមាន​សេចក្ដី​ខ្នះខ្នែង មិន​ខ្ជិល​ច្រអូស សង្រ្គោះ​ជនជា​បរិសទ្យ តែងប្រព្រឹត្ត​នូវ​អំពើជាទី​គាប់ចិត្ត​នៃស្វាមី ថែទាំ​សម្បតិ្ត​ដែលស្វាមី​រកបានមក នារីណា ជាស្រ្ដី​លុះក្នុង​អំណាច​សេចក្ដី​ប្រាថ្នា​របស់​ស្វាមី ប្រព្រឹត្ត​យ៉ាងនេះ នារីនោះ រមែង​ទៅកើត​ក្នុងពួកទេវតា ឈ្មោះ មនាបកាយិកា។