[១៧] ម្នាលភិក្ខុទាំងឡាយ ស្រ្តីតែងចង​បុរស​ដោយអាការ ៨ យ៉ាង។ អាការ ៨ យ៉ាង តើដូចម្ដេច​ខ្លះ។ ម្នាលភិក្ខុទាំងឡាយ ស្រ្តីចងបុរស​ដោយរូប ១ ម្នាលភិក្ខុ​ទាំងឡាយ ស្រ្តីចង​បុរស ដោយ​សំណើច ១ ម្នាលភិក្ខុ​ទាំងឡាយ ស្រ្តីចងបុរស ដោយ​និយាយ ១ ម្នាលភិក្ខុ​ទាំងឡាយ ស្រ្តីចងបុរស ដោយចម្រៀង ១ ម្នាលភិក្ខុ​ទាំងឡាយ ស្រ្តីចង​បុរស​ដោយយំ ១ ម្នាលភិក្ខុ​ទាំងឡាយ ស្រ្តីចង​បុរស ដោយការស្អាង (មានវិធី​ស្លៀកពាក់​ជាដើម) ១ ម្នាលភិក្ខុ​ទាំងឡាយ ស្រ្តីចងបុរស ដោយគ្រឿង​បណ្ណាការ មានផ្កា​ឈើ និង​ផ្លែឈើ ដែលខ្លួន​កាច់មក​អំពីព្រៃ ១ ម្នាលភិក្ខុ​ទាំងឡាយ ស្រ្តីចងបុរស ដោយផស្សៈ ១។ ម្នាលភិក្ខុ​ទាំងឡាយ ស្រ្តីចង​បុរស​ដោយ​អាការ ៨យ៉ាងនេះឯង ម្នាលភិក្ខុ​ទាំងឡាយ ពួកសត្វ​ដែលស្ត្រី​ចងក្រៀក ដោយអាការទាំង ៨ យ៉ាងនេះឯង ឈ្មោះថា ជាប់អន្ទាក់។